قبل ماتشتري، كيف تعرف الموبايل اذا كان اصلي او لا
تعتبر الهواتف الذكية اليوم من الادوات المهمة جدا لكل الناس وده نظرا للفائدة الكبيرة وقدر شنو بتسهل علينا كتير من الامور.
وبالنسبة للطلاب في الجامعة بتعتبر التلفونات الذكية من المستلزمات المهمة جدا ومن خلالها بيقدر الطالب ينزل الشيتات والمراجع وهو في البيت، يقدر يقرا من التلفون في اي مكان (في الموصلات مثلا) ، بيقدر يتواصل مع الدفعة ويعرف كل الحاصل لحظة بلحظة، يسجل المحاضرات، الدراسة اونلاين، وغيرها من الامور المهمة.
وعشان كده مهم جدا انو يكون عندك تلفون كويس تقدر تعتمد عليهو ومايخذلك، ومهم انك تقدر تميز بين الجهاز الاصلي وغير الاصلي لما تجي تشتري حتي تقدر تختار اختيار يريحك وماتشيل هم انو ممكن التلفون يموت في اي لحظة وبدون اي مقدمات وبالتالي حتفقد قروشك وكل البيانات المهمة.
المشكلة انو الفترة الاخيرة انتشرت نسبة كبيرة من التلفونات ذات الجودة الرديئة واسعارها تكاد تكون نفس اسعار الاجهزة الاصلية وبالتالي بتزيد من صعوبة التمييز بين الجهاز الاصلي وغير الاصلي.
وحنشوف في المقال ده تلاته خطوات بسيطة من خلالها بنقدر نعرف اذا كان الجهاز مطابق للمواصفات أو لا، حتي نقدر نختار اختيار صحيح ومريح.
١. اول حاجة خلينا نعرف مصطلح اسمو ال IMEI وهو باختصار كده ممكن نقول عليهو الرقم التسلسلي لمقعد الشريحة الفي تلفونك، ودايما بيكون مميز وغير متكرر
وبالتالي لو تلفونك فيهو شريحة واحدة حيكون عندك رقم IMEI واحد، واذا تلفونك بشيل شريحتين حيكون عندك رقمين IMEI
واذا عاوز تعرف الرقم ده اضغط علي #06#* وحيظهر ليك
بعد ماتعرف الرقم ده شيل اول ٨ ارقام من الشمال لليمين وادخل علي الموقع التالي
http://imei.tpra.gov.sd/
واكتب ال٨ ارقام في المربع الظاهر واضغط check وحيوريك اذا كان تلفونك مطابق للمواصفات او لا
٢. تاني حاجة اتاكد انو رقم ال imei الظهر ليك هو نفسة المكتوب في الكرتونة بتاعت التلفون
٣. اخر حاجة لازم تنتبه ليها انو التلفون يكون مقفول في كرتونتو ومعاو كامل الملحقات بالاضافة ل(كرت الضمان)، ويكون علي الاقل سنة
كرت الضمان بيضمن ليك انو اذا التلفون مات براو فجاءة خلال فترة الضمان، ممكن ترجع لنفس المكان الاشتريتو منو ويتم تصليح العطل او تبديلو بواحد تاني جديد 😍
مصطلح (مات براو) مقصود بيهو انو التلفون ممكن يتوقف عن العمل فجاءة وبدون اي اسباب (والحاجة دي بتحصل كتير للتلفونات الغير اصلية)، لكن لو وقف عن العمل بسبب اهمال منك، في الحالة دي تستحمل نتيجة اهمالك بس 😁
عادتا الناس البتبيع تلفونات غير اصلية مابيكون عندو كرت ضمان او يقول ليك ضمان (ضمان تجريبي) او (ضمان محل) تلاته ايام او تلاته شهور وهكذا.
اعمل شير وشارك المعلومة مع غيرك حتي نقدر نحارب الغش الموجود في الاسواق عن طريق الوعي والمعرفة.
تعليقات
إرسال تعليق