كيف اكون منتج في زمن الحرب

طبعا كلنا بنتمني وبشده نهاية الحرب الحاصلة دي في اقرب وقت ممكن لانو استمراراها علي حساب المواطن البرئ قبل كل شئ

يمكن جزو كبير مننا طلع من الخرطوم، وفي جزو موجود في بعض مناطق الخرطوم الامنة، وكمان في ناس سافرت بره الخرطوم وحست بملل شديد وقررت انها ترجع تاني

والتحدي المشترك البواجه كل الناس هو عدم الموضوع الحاصل وكتير من الناس بقت مجبورة تقعد في البيت بدون دراسة او شغل او مصدر دخل او رؤية واضحة لمستقبلها

حنشارك في البوست ده بعض الافكار الحتساعدنا نكون منتجين في الوفت ده، لانو حتي المتابعة الدؤوبة للوضع السياسي ممكن تؤثر سلبا علينا وترهقنا نفسيا

• الفكرة الاولي: التطوع

التطوع يعتبر من الانشطة المفيدة والمهمة لكل الشباب بصورة عامة والطلاب الجامعيين بصورة خاصة، لانو بيساعد الفرد في تنمية المهارات وفي اختيار مجال العمل  

ويعتبر من المتطلبات المهمة في المنح الدراسية الكبيرة، وقبل كل شئ يعتبر خدمة انسانية ومساعدة للغير. 

ممكن الواحد يتطوع في مجال خبرتو باستخدام المهارات البيمتلكها او في اي مجال تأني. 

وبعض من الامثلة هي :

١- حصر ومساعده كبار السن في المنطقة بتاعتك عن طريق توفير احتباجات البيت او المرسال او اي احتياجات تانية. 

٢- المشاركة مع شباب الحي في نظافة وتأمين المنطقة و الاسواق الصغيرة داخل الحي. 

٣- لو كنت في ولاية امنة خارج الخرطوم، ممكن انت وشباب الحي تساهمو في مساعدة اللاجئين من الخرطوم في توفير فرص ايجارات باسعار مناسبة وتبعدوهم عن تجار الازمات او تقدموا اي نوع من المساعدات الممكنة 

• الفكرة الثانية: الدراسة والكورسات الاونلاين

ممكن نستفيد من وقتنا عن طريق دراسة كورسات اونلاين حتفيدنا في المسار المهني، ومن اشهر مواقع الكورسات الاونلاين هي كورسيرا، edx، ادراك

ممكن برضو تحسن من مهاراتك في اللغة الانجليزية عن طريق الاستماع او القراءة للكتب الانجليزية، او ممكن تبداء وتتعلم لغة تانية عبر تطبيق دولنقو. 

• الفكرة الثالثة: عمل مشاريع جانبية كمصدر دخل

من المهم الناس تحاول تشتغل بقدر الامكان حتي تقدر تساعد نفسها والناس الحوالينها، خصوصا كل الناس المرتباتهم وقفت او شغلهم اتاثر بصورة كبيرة بسبب الحرب

ومن اكتر افكار المشاريع المناسبة والملوبة بشدة في الوضع الحالي هي الزراعة وخصوصا للناس النزحت الولايات، لانو الموسم الزراعي السنة دي اولوية قصوي.