كيف اقدر اشتغل في زمن الحرب؟
يمكن كلنا نرينا بالحوجة المادية الشديدة خلال فترة الحرب دي، وللاسف جزو كبير من الناس فقدت اشغالها ومصادر رزقها
حنشارك في البوست ده بعض من افكار الاشغال البسيطة وسريعة التطبيق والمطلوبة في الوقت الحالي ومن خلالها بنقدر نسد ولو جزء من الاحتياجات المادية اليومية
١- بيع رصيد وكهربا
الطلب علي الرصيد والكهرباء في الوقت الحالي اعلي من باقي الاوقات لانو الناس بتكون قاعده في البيوت وماسكة تلفوناتها الوقت كلو
الحاجة الكويسة انو الانترنت مستقر نوعا ما، وبالتالي ممكن تستخدم التطبيقات البتوفر خدمات الكهربا والرصيد مقابل نسبة ربح ليك ١٠٪ مثلا
وبعض التطبيقات هي ريتا Pay او بنكك
٢- نظافة مكيفات او توصيلات كهرباء
ولانو الناس قاعده في البيوت فبالتالي حتكون محتاجة استخدم المكيفات خصوصا في الاجواء السخنة دي
ومن المعروف انو المكيفات بتحتاج صيانة ونظافة عامة مرة واحده كل سنة علي اقل تقدير، وبالتالي دي فرصة ومصدر دخل كويس
٣- بيع تلج
هي فكرة مناسبة في الوقت الحالي نسبة للسخانة وقطوعات الكهرباء المستمرة وبالتالي الطلب علي التلج حيكون عالي
٤- صيانة المباني والطلبة
في ناس كتيرة فضلت انها تصين او تبني بيوتها او بيت العائلة الكبير البعيد من مناطق الاشتباكات نسبة لفرصة وجودهم في البيوت وانخفاض مواد البناء، فبالتالي اذا عندك المهارة دي حتكون فرصة كويسة والشغل حيمشي وان شاء الله ماحيقيف
٥- العاب بليستيشن
اذا عندك بليستيشن او في زول قريب ليك عندو، ممكن تعمل مكان العاب بليستيشن في اقرب دكان في الحلة، وان شاء الله حينجح لانو في كمية كبيرة من الشباب والاطفال موجودين في البيوت وعندهم الرغبة يفرقو عن نفسهم شوية.
٦- تدريس مهارة او حاجة انت كويس فيها (اكسل، محاسبة الكترونية، اساسيات التمريض والاسعافات الاولية)
اذا عندك المهارة المناسبة وبتحب التدريس، ممكن تعمل كورسات قصيرة بحيث تكون مفيدة وفيها اكبر قدر من التطبيق العملي حتي الطالب يحس الاستفادة الحقيقية
وممكن الكورسات تكون اونلاين (زي الاكسل او المحاسبة الالكترونية) او في اقرب مكان مناسب وأمن في المنطقة الانت فيها (زي اللغة الانجليزية واساسيات التمريض والاسعافات الاولية)
٧- الزراعة
دي فرصة كبيرة لكل واحد موجود في واحدة من ولايات السودان المشهورة بالزراعة نسبة للحوجة الكبيرة البتمر بيها البلد في السنة دي.
تعليقات
إرسال تعليق