اهم النصائح وأفضل الاستراتجيات داخل قاعة الامتحان

التوتر و الخوف من اكتر العوامل البتأثر علي ادائك اثناء الامتحان، حتى لو انت مستعد ومراجع كل المعلومات بالكامل، لكن التوتر حيضيع عليك كتير من المعلومات، وحنشوف في البوست ده سبعة نصائح حتساعدك وحتسهل عليك كتير داخل غرفة الامتحان. 

اولا: الهدوء:

الهدوء بيساعد كتير في صرف العقل عن التوتر، من خلال انك تحاول تنظم عملية التنفس وتحاول تهدي نفسك بقدر الامكان.

ثانياً: لا تحاول تذكر معلومة صعبة أو سؤال صعب

من أكبر الأخطاء بنعملها داخل غرفة الامتحان قبل ما نبدا نحل، هو انو نحاول نتذكر تعريفات او دروس نحن صعبة، عملية الاسترجاع بتزيد التوتر والخوف وبالتالي بتنسي نص المعلومات العندك. 

ثالثاً: تجنب ضغط الوقت 

مهم جدا انك ما تقع في فخ ضغط الوقت عشان التوتر و الخوف بيخليك تفقد كثير من الدرجات

لما تبدا تحل حاول راقب مدة حل كل سؤال وفي حالة مضيت زمن طويل في سؤال واحد خليهو طوالي وامشي للسؤال البعدو. 

رابعاً: دقيقتين راحة 

من اكتر الخطوات الذكية وخصوصاً لما يواجهك سؤال صعب او مختلف عن باقى الاسئلة، هو أنك تتوقف عن الكتابة تماماً و تبدأ تفكر في أشياء قريبة ليك او اشياء بتحبها في خلال الدقائق دي بتعمل علي استراحة قصيرة للعقل و دا بيعيد النشاط مرة أخرى و تبدأ من جديد بكامل النشاط و الراحة. 

خامساً: تذكر بالكتابة 

في بعض الأحيان بتواجهك اسئلة انت عارفة الاجابة ليها لكن مع التوتر بتنسي الإجابة، يلا هنا تستخدم طريقة التذكر بالكتابة وهي انك تختار إي جزء فاضي في ورقة الامتحان و تبدأ في كتابة إي شي عندو علاقة بالسؤال ويفضل انك تستخدم قلم الرصاص، العملية دي بتحفز الذاكرة و بتسهل عليك عملية استرجاع المعلومات من جديد و بكدا تقدر تحل السؤال. 

سادسا: قليل من الارتباك

وهي من الحيل البتسخدم في اسئلة أختار الإجابة الصحيحة، في حالة مقابلتك سؤال من النوع ده، خت يدك في كل الإجابات الموجودة ما عدا واحدة و أبدا في محاولة ربط بين الاجابة والسؤال.

الحيله دي بتعمل علي استرجاع او ربط بين المعلومات الصحيحة و السؤال وبتمنع الارتباك و خصوصا اذا كانت الإجابات متشابهة.

سابعا واخيرا: الامانة

مهم انك تكون امين في اجاباتك وتتجنب الغش بقدر الامكان، لانو ممكن تنقل اجابات غلط حتي اذا كان من اول الدفعة 

وده طبعا غير انك لما تغش بتعرض مستقبلك ومسيرتك الاكاديمية لخطر كبير جدا في حالة تم اكتشافك

ساعات الامتحان تعتبر اختبار حقيقي لمجهوداتك، والنجاح بعدها بيكون عندو طعم جميل ومميز جدا، وبيعزز الثقة بالنفس وبالتالي بتنعكس بصورة واضحة جدا علي مستوي حياتك العامة والشخصية