تطبيقات قوقل التي لا تعرفها وكيف يمكن ان تسهل حياتك

هل تعلم انو شركة قوقل عندها حوالي ١٣١ تطبيق بتخدم اغراض مختلفة، وبتسهل علينا الحياة بصورة كبيرة جدا، لانها بتخلي كل شئ بسيط وفي مكان واحد، بس للاسف انو اغلبنا مابنعرف غير (بحث قوقل واليوتيوب او مترجم قوقل) 

في البوست ده حنمر علي بعص الخدمات المهمة والغير معروفة للاغلبية ونشوف كيف ممكن نستفيد منها، 

اول حاجة لازم يكون عندك حساب قوقل حتي تقدر تستفيد من الخدمات دي، ومجرد ماتعمل ايميل في Gmail طوالي حيكون عندك حساب في قوقل، وحستسخدم عنوان الايميل وكلمة السر حتي تدخل علي باقي التطبيقات. 

ومن اهم التطبيقات دي:

١- تطبيق Google Drive، وهي عبارة عن ذاكرة تخزين مجانية بسعة ١٦ قيقابيايت علي الانترنت، وفيها ممكن تحتفظ بكل ملفاتك او بياناتك الخاصة، وتقدر تدخل عليها من اي جهاز سواء كان لابتوب او ديسكتوب او موبايل او تاب او .. الخ، وممكن تعمل دعوة لناس تانية تقدر تستعرض او تعدل في الفايلات دي. 

والخدمة دي حلت لينا مشاكل فقدان الفلاشات الممكن نكون محتفظين فيها ببيانات مهمة واستحالة استرجاع البيانات في الحالة دي

برضو حلت لينا مشاكل الفايروسات الممكن تنتقل عن طريق الفلاشات من جهاز لجهاز تاني

تطبيق الدرايف بيكون نازل بصورة تلقائية في اغلب اجهزة التلفونات، وممكن تدخل عليهو عبر متصفح الانترنت من الكمبيوتر من خلال الرابط

https://drive.google.com

بعض الاستخدمات المفيدة للقوقل درايف :

- الاستخدام الاول : اكتر الحجات البتتنسي هي ال user names وال passwords خصوصا لما تكون داخل في مجموعة من المواقع والمنصات علي الانترنت او لما يكون عندك اكتر من ايميل في اكتر من مكان، فبالتالي ممكن تعمل ملف علي الدرايف وتخت فيهو كل البيانات دي او حتي تعمل screenshots وتخزنها في الملف ده، وكلما تحتاج ليها حتلقاها بكل سهولة. 

- الاستخدام الثاني : في كتير من الاحيان بتلقي نفسك محتاج لمستنداتك الرسمية (بطاقة قومية، جواز سفر، سيرة ذاتية شهادة جامعة.. الخ)، فبالتالي ممكن تصور كل مستنداتك المهمة وتعمل ملف علي الدرايف وتخت فيهو كل المستندات دي، حتي تقدر تصل ليها في اي وقت بكل سهولة ويسر وممكن تطبعها اذا احتجت. 

- الاستخدام الثالث : لو انت طالب، ممكن تحتفظ بكل مراجع وشيتات السمستر في ملف علي الدرايف وتخلي خيار المشاركة مفتوح وترسل الرابط في قروب الدفعة، فبالتالي اي واحد من الدفعة بيقدر يوصل لاي مرجع او محاضرة في السمستر، وممكن يطبعها وماحيحتاج لفلاش ينقل بيه المواد او يضطر يجي الجامعة عشان يتحصل عليها وخصوصا في ايام الامتحانات. 

٢- تطبيق Google Docs، وهي خدمة مشابهة لبرنامج Microsoft Word الشهير، ومن خلالها بتقدر تنشئ ملفات نصية وتكون محفوظة في حسابك في قوقل، وبالتالي ممكن تفتح نفس الملف من اكتر من جهاز وتواصل شغلك، وممكن تعمل دعوة لناس تانية تشاركك في كتابة الملف.

وتوجد امكانية التحويل لفايل Microsoft Word المعتاد

٣- تطبيق Google Sheets، وهي خدمة مشابهة لبرنامج Microsoft Excel الشهير، ومن خلالها بتقدر تنشئ جداول وتحفظها في حسابك في قوقل وممكن تدعو ناس تشاركك الشغل في نفس الجدول. 

وتوجد امكانية التحويل لفايل Microsoft Excel المعتاد

٤- تطبيق Google Slides، وهي خدمة مشابهة لبرنامج Microsoft PowerPoint الشهير، ومن خلالها بتقدر تعمل عروض توضيحية وتحفظها في حسابك في قوقل او تشاركها مع ناس تانية. 

وتوجد امكانية التحويل لفايل Microsoft PowerPoint المعتاد

٥- تطبيق Google Contacts، والهدف منها هو ربط الاسماء وجهات الاتصال بحسابك علي قوقل، وبالتالي حتقدر توصل لكل الأسماء والارقام بتاعتك بكل سهولة في حالة فقدت تلفونك. 

٦- تطبيق Keep notes، وهي خدمة لعمل نوتات وتدوين الملاحظات او الافكار وغيرها، والحاجة الجميلة انها بتدعم اكتر من لغة (لانو اغلب تطبيقات النوتات البتجي مع الاجهزة بتدعم اللغة الانجليزية فقط واذا حاولت تكتب بلغة تانية زي العربي ممكن تكتب بس التنسيق بسكون ملخبط او بيظهر من الاليسار لليمين وليس من اليمين لليسار)، بالاضافة للميزة الرائعة انك ممكن تبداء تكتب في موضوع معين من التلفون وتجي تواصل في نفس الموضوع من اللابتوب او الايباد او غيرو، وكمان في خاصية تحويل ال note الي Google Document وتفتحو عن طريق تطبيق ال Google Docs.