كيف تتغلب علي عدم الرغبة في المذاكرة؟

ما هو التسويف ؟  

مثلاً لما تقرر أنك تقرأ مادة من موادك الدراسية و خصوصاً المادة البتكون ما محببة ليك (المادة البتشوفها قنبلة ملل و عايز تخلصها بسرعة عشان وراك مواضيع تانية) هنا عدم رغبتك في قراءة المادة دي بتفعل مراكز الألم في المخ أي شعور الألم، دا بيخلي المخ يحاول يصرفك عن القراية و يخلق ليك مواضيع اكتر تسلية، زي تشغل نفسك بتلفون و تتصفح الفيسبوك او الواتس، أو انك تمشي تشرب موية وتقعد اكتر من ربع ساعة وكلها حجج بتصرفك عن القراية .. وده هو مايعرف بالتسويف. 

 

في كتير من الناس بتربط بين التسويف و سوء إدارة الوقت لكن في الحقيقة، التسويف مختلف تماماً عن سوء إدارة الوقت، يرتبط سوء إدارة الوقت بعدم وضع جدول و الالتزام بيهو، أما التسويف يرتبط بعدم السيطرة على المشاعر وخصوصاً الشعور بعدم الرغبة بشئ والملل و القلق. 

كيف تقدر تتغلب على التسويف؟ 

حنشوف مع بعص مجموعة من الطرق البتساعد الواحد انو يتغلب علي التسويف 

١- أثناء المذاكرة حاول تتكلم مع نفسك بصوت عالي نسبياً و تأمر نفسك بإنجاز الدروس في المواد المقرر أنك تخلصها ودا ح يخليك تقاوم الرغبة في ترك المذاكرة وبيساعدك أنك تنجز كل الدروس العليك. 

 ٢- لو انت داخل علي فترة امتحانات و كان عليك كتير من الدروس المفروض انك تخلصها و ما عندك الرغبة في مذاكرتها دا بيزيد من شعور الألم في مراكز المخ وخصوصا لو كانت المادة صعبة بالنسبة ليك ، دايماً أبدا بحاجة انت بتحبها عشان دا بيخفف من شعورك بألم أو التسويف ، وبيساعدك انك تركز في المذاكرة بدون تشتيت. 

 ٣- عشان تحارب التسويف لازم انك تبعد نفسك من المشتتات زي تقفل وتبتعد عن تلفونك وتبتعد عن كل الحاجات البتشتتك و تحدد ليها وقت مناسب عشان تستمتع بيها بعد دراستك. 

٤- من الطرق الفعالة كمان انك بعد كل فترة بتقضيها وانت بتقرا تكافئ نفسك بشوية حاجات انت بتحبها لو كان اي نوع من الأكل او الشوكولاتة او انك تلعب لعبة بتحبها او تطلع من مكان دراستك تتمشى، دي كلها بتفيدك وتعيد نشاطك من جديد 

وكمان ممكن تقرر انك تقرا ٢٥ دقيقة و ١٥ دقيقة فري ليك دا بيساعد المخ و بيجنبو الشعور بتسويف و تسمى (متعة خالية من الذنب) يعني انك بتعمل حاجات بتحبها بعد انجازك الدروس المقرر تنجزها ودا بيجنبك الشعور بذنب على عدم انجازك المهام وتركك ليها. 

التسويف من المواضيع المهمة والمتوسعة وفي كتير من علماء النفس اتكلموا عنو وعن واضرارو النفسية، ومن من المهم جدا انك تعرف عن التسويف وكيف تتحكم بمشاعرك، ودا بيخليك قادر انك تشتغل تحت اي ظرف او ضغظ بدون ما تفقد تركيزك.