٤ حقائق لازم تعرفها قبل ما تختار تخصصك الجامعي

اختيار التخصص الجامعي واحدة من الامور الحساسة والمهمة لكل طالب وبتحدد الكتير من الحجات في مسيرة ومستقبل الطالب ككل

بس في مجموعة من الحقائف المهم جدا تعرفها وتراعيها قبلما تختار تخصصك الجامعي وهي:

١- لازم تدرك انو القرار هو قرارك

دائما الناس بتختار بناءا علي رغبة الاهل او بناءا علي نسبتها في الثانوي (يعني الواحد بيشوف النسبة البتدخلو وين وبملي علي اساسها الرغبات)، وفي كتير من الاحيان بعدما الواحد يوصل لنصف مشوارو الجامعي بيكتشف انو دي مارغبتو وبيبدا يفكر في تغيير المجال او يفتش علي حلول بديلة، وتفاديا لكل ده لازم الواحد بختار الحاجة الفعلا بيحبها وبيرغبها. 

٢- مافي تخصص افضل من تخصص

في الحقيقة انو كل التخصصات مكملة لبعضها البعض وكل تخصص مابيقدر يشتغل بدون التخصص التاني، يعني الدكتور مثلا مابيقدر يشتغل لو ماكانت المستشفي فيها كهربا او صرف صحي

وبالرغم من انو المجتمع بيفضل بعض التخصصات، لكن في النهاية كل التخصصات مهمة ومفيدة. 

وفي حاجة مهمة جدا الناس مابتنتبه ليها، وهي انو الطلب علي التخصصات متغير من فترة والتانية، مثال علي كده انو في فترة من الفترات في السودان كان الطلب علي هندسة النفط عالي جدا ولكن بعد فترة الحكاية اختلفت ونسبة كبيرة من خريجي النفط مابلقوا شغل وبالتالي قل الطلب علي هندسة النفط بصورة ملحوظة. 

وعشان كده بنقول احسن تختار الحاجة البتحبها من البداية وتستمر فيها

٣- المواد الكنت بتحبها في الثانوي وبتجيب فيها درجات عالية بتعتبر مؤشر جيد بيساعدك علي اكتشاف ميولك واختيار التخصص الانسب بالنسبة ليك

٤- من الطرق والاستراتجيات الفعالة والبتساعد كتير في اختيار التخصص الجامعي هي انك تسال خريجين وناس شغالة في المجالات البتفكر فيها، وده بيساعدك تتحصل علي معلومات اكتر عن طبيعة المجال ومتطلباتو وواقع وبيئة العمل والمعلومات دي حتساعدك تحدد بصورة ادق اذا كان التخصص مناسب بالنسبة ليك او لا. 

وفي المقالات الجاية حنتكلم عن عدد من التخصصات في الجامعات السودانية ونجاوب علي الاسئلة البتشغل بال كل طالب مقبل علي اختيار تخصصه الجامعي، وبنتمني التوفيق والسداد للكل.