كيف استفيد من الاجازة واحول قعاد البيت لحاجة ظابطة جدا

كيف استفيد من الاجازة واحول قعاد البيت لحاجة ظااابطة جدا ؟

الاجازة من اكتر الحجات المميزة والمحببة لكل طالب مهما كان عمره او مرحلتو الدراسية او تخصصو، ودايما الواحد بيخطط انو يعمل فيها كل الحجات الكان محروم منها ايام الدراسة (تنوم زي ماعاوز، تطلع مع اصحابك، تترفه بدون اي قيود او حواجز،.. الخ)

بس الحقيقة غالبا بتكون غير كده، وانو مجرد ما الاجازة تجي ويعدي منها اول اسبوع، طوالي الواحد بيبداء يحس بالملل وعدم الموضوع

ومرات ممكن تلقي نفسك دخلت في دوامة تانية زي الالتزامات الفي البيت، وللبنات مواضيع الاهتمام بالاخوان الصغار و النضافة الكتيرة والمتعبة والغسيل المتواااصل لعدة البيت المابتنتهي، وهكذا تمر الايام الي ان تنتهي الاجازة بدون مانكون استفدنا منها استفادة حقيقية

وهنا بيجي سؤال مهم جدا .. الحل شنو؟ لانو بالطريقة دي الاجازة زيها وزي ايام الدراسة وممكن تكون اسواء

الحل ياصديقي هو في ( الموضوع )، لازم يكون عندك موضوع تكون جهزت ليو مسبقا

المشكلة انو كتير من المرات مابنكون عارفين الموضوع شنو ومابنبداء نفكر الا بعد الاجازة تبدا او يمر منها اسبوع

مهم جدا انو نخطط حتي قبل الامتحانات زاتو

من هنا نجي للسؤال التاني .. الموضوع شنو ؟

في الحقيقة المواضيع والحجات الممكن تعملها في الاجازة وتستمتع بيها وتستفيد منها هي كتيرة جدا، وحنديكم امثلة لبعض منها

١- ممكن تنزل تدريب عملي (Training) في المجال البتدرسو او حابي تتخصص فيهو، وفي الحقيقة فترات التدريب العملي مهمة لكل طالب، لانها تجربة ممتعة ومفيدة في نفس الوقت وبتساعد الزول يشوف بيئة العمل بتاعت المجال الاختارو ويحدد من بدري اذا كان فعلا دي الحاجة العاوزها ولا لا. 

٢- طور مهاراتك ومستواك في هوايتك الانت بتحبها، والاجازة تعتبر افضل وقت للحاجة دي، واذا واصلت بنفس الطريقة في كل اجازة، حتلقي نفسك حصلت مستويات بعيدة جدا بعد ماتتخرج وممكن جدا انو الهواية دي تكون مصدر رزقك وفاتحة خير عليك. 

٣- التطوع (volunteering)، الفكرة في التطوع هي الرغبة في المساعدة وتقديم يد العون بدون انتظار عاوئد مادية. 

التطوع عادتا بكون مع المنظمات (محلية او عالمية) ومن فوائده هي تنمية روح المبادرة والعطاء وبتضيف للزول تجربة مميزة جدا وقيمة كبيرة في السيرة الذاتية وبتساعدك في المنح الدراسية الخارجية للماجستير. 

٤- جرب حاجة جديدة عليك … واستمتع واستفيد من التجربة دي، (اتعلم تسوق عربية او عجلة، اتعلم سباحة، اتعلم تطبخ او تزرع، اتعلم لغة جديدة، جرب تسافر مع اصحابك او براك، جرب تزور اكبر عدد من اهلك المابتعرفهم وعمق علاقتك بيهم، جرب ابداء بزنزك شغلك الخاص، و.. الخ

٥- جرب ادرس كورس اونلاين، لانو الكورسات الاونلاين اصبحت منتشرة ومتزايدة كل يوم ومفيدة جدا، وحتستحوذ علي نسبة كبيرة من التعليم في المستقبل القريب.