كيف تصنع CV احترافي في 5 خطوات
كلمة cv اختصار ل curriculum vitae ومعناها السيرة الذاتية، وهي مستند يعبر عن الخلفية التعليمية والخبرة العملية للفرد وتستخدم في التقديم للوظايف المختلفة.
حنتناول في الموضوع ده خمسة خطوات بسيطة بتساعدك في كتابة cv احترافي في خمسة خطوات بسيطة وسهلة
• الخطوة رقم ١ تحديد التخصص
من المهم انك تحدد التخصص العاوز تستمر فيهو، بس في بعض الأحيان كتير من الناس ممكن ماتكون عارفة تختار شنو، وفي الحقيقة اختيار التخصص الدقيق من الامور البتحتاج وقت ومجهود حتي تقدر تصل للحاجة المناسبة ليك وتكون متاكد ومقتنع منها.
• الخطوة ٢ :استذكار جميع مهاراتك وخبراتك العملية المتعلقة بالتخصص المختار
حاول اتتذكر مهاراتك وهواياتك وكل الحجات البتقدر تعملها بصورة ممتازة ويكون عندها علاقة بالتخصص
بعض الامثلة
الرغبة المستمرة في تعلم اشياء جديده
امكانية القيادة وادارة الفريق
امكانية العمل ضمن المجموعات
المقدرة علي حل المشاكل والنزاعات
.. وغيرها
وكمان اذا عندك اي اشغال اشتغلتها سوا كان بصورة رسمية او غير رسمية، او تطوع، او فترة تدريب، بشرط يكون عندها علاقة بالتخصص، من المهم انك تذكرها.
• الخطوة رقم ٣ : ال cv الاحترافي بيتكون من ٦ اجزاء اساسية وهي:
- ال Personal Profile:
بتتكلم عن نفسك، وبتذكر اهم انجازاتك وامكانياتك في المجال
- ال Experience :
بتذكر فيها جميع خبراتك العملية في المجال
- ال Education :
بتذكر مؤهلاتك الاكاديمية، دبلوم، بكلاريوس، ماجستير .. الخ
- ال Skills :
بتذكر مهاراتك العندها علاقة مباشرة بالمجال
- ال Language :
بتذكر اللغات البتجيدها، مع ذكر مستواك في كل لغة سةاء كان Beginner او مبتدئ
او بتقدر تتواصل بصورة معقولة
Good Working Knowledge
او انك فصيح Fluent
- ال Certificates & Training :
وفيها بتذكر الكورسات والتدريب العملتو في المجال
• الخطوة رقم ٤: اعادة صياغة الكلام باستخدام لغة محترفة ومراعاة الكلمات المفتاحية المناسبة للتخصص
عشان تشوف الحاجة دي ممكن تبحث وتنزل تلاته نماذج لسيرات ذاتية في تخصصك من قوقل وتختار الكلمات المناسبة
كمثال للبحث : free cv template for nursing
• الخطوة رقم ٥: الخطوة الاخيرة هي التصميم الجميل
من المهم مراعاة انواع الخطوط واحاجمها، الالوان، التسنيق والشكل العام لل cv، والخطوة دي تعتبر مهمة جدا لانها بتسهل علي الزول يقرا ال cv بتاعك
أحيانا لما يكون الcv بتاعك في منافسة مع اعداد كبيرة مع السيفيهات التانية بيكون عامل التصميم الجميل والجذاب حتمي انو يجذب انتباه مدير التوظيف ليك.
ممكن تعمل بحث عن نماذج cv في قوقل باسم تخصصك في صورة ملف Microsoft Word، كمثال ممكن تكتب
free developer cv template docx
او ممكن تستخدم نماذج ال cv وال resume المجانية الموجودة في ال Microsoft Word
• امتلاكك ل cv احترافي هي عملية مستمرة، اصعب جزء فيها لما تكتبو اول مرة وممكن ياخد منك اكتر من يوم، بس بعد كده بيكون من السهل انك تعمل اضافات وتعديلات حسب الحوجة
من المهم كمان انك تبحث وتقرا اكتر عن الموضوع حتي توسع معرفتك وتزيد خبرتك اكتر.
تعليقات
إرسال تعليق