كيف اطور لغتي الانجليزية ج١
كتير مننا بيعاني من مشاكل في اللغة الانجليزية وبيكون عندنا الرغبة اننا نحسن لغتنا ونقدر نتكلم ونتواصل بطلاقة.
اللغة الانجليزية اليوم هي لغة العلم والتقدم، وهي اللغة الممكن تقدر تتواصل بيها في اي بلد في العالم، وكلما اتقنتها اكتر بتوفر لنفسك فرص اكتر وافضل.
عشان كده حنوريكم في سلسلة المقالات الجاية السر اللي بيهو حتقدروا تطوروا وتحسنوا من لغتكم الانجليزية وكمان حتكونوا قادرين تتخاطبوا وتسمعوا وتفهموا اي محادثة باللغة الانجليزية.
(المواظبة اليومية والاستمرارية) علي الاستماع او القراءة باللغة الانجليزية هي العامل الاساسي الحيساعدك في تطوير وتحسين لغتك الانجليزية.
المواظبة مقصود بيها انك تسمع او تقرأ يوميا مدة عشرة دقايق ولمدة ستة شهور علي الاقل
في البداية ممكن تحس انو ال(عشرة دقائق) دي بسيطة وانك مفروض تقعد مده اطول من كده ، بس السر هو في الاستمرارية وليس في المدة اليومية
يعني مثلا، تستمع للغة مدة عشرة دقايق في اليوم لمدة ستة شهور افضل من انك تستمع للغة مدة ساعة او ساعتين وماتقدر تستمر اكتر من اسبوعين او شهر ..
وكلما كانت المدة اليومية بسيطة (عشرة دقائق) كلما بتكون متحمس وعندك رغبة وقابلية اكتر انك تستمر لفترات اطول (وممكن تستمر لاكتر من ستة شهور)
لما تواظب علي الاستماع والقراءة، حتلاقي كلمات جديدة حتزيد من ذخيرتك اللغوية ومن خلال مواظبتك اليومية حتلاقي الكلمات دي بتتكرر عليك وبترسخ في ذهنك اكتر واكتر
التكرار بيخزن الكلمات والمصطلحات الجديدة في الذاكرة طويلة المدي وبيكون من الصعب انك تنساها بسهولة، علي عكس لما تتعلم كلمة جديدة وماتكررها كم مرة حتنساها بسرعة وفي ايام معدودة
حنواصل في الجزء التاني ونشوف قائمة ببعض المصادر المفيدة للاستماع والقراءة الحتساعدك في تطوير لغتك الانجليزية.
اعمل لايك لو عرفت معلومة مفيدة في المنشور ده وكمان اعمل مشاركة (شير) او منشن اصحابك عشان المعلومة تنتشر وتوصل لكل شخص ممكن يكون محتاج ليها
تعليقات
إرسال تعليق