اهم المعلومات الواجب معرفتها عن الذاكرة البشرية وطرق المحافظة عليها
دايما لما نجي نذاكر او نتعلم حاجة جديدة بنكون محتاجبن لذاكرة قوية عشان نقدر نحفظ بيها المعلومات، ومرات بنفتش في طرق عشان نقوي بيها الذاكرة حتي نقدر نستفيد من أي كلمة وجملة اتعلمناها، بس في البداية خلينا نعرف اكتر عن ذاكرة الانسان
ذاكرة الانسان العادي هي المكان البتتحفظ فيه المعلومات في المخ علي فترات متفاوتة وبتحتوي علي ٢.٥ مليون بايت ودا بيعني ان الانسان عندو مساحة كبيرة جداً للتخزين المعلومات، يعني لو انت عايز تسجل فيديو مستخدم ذاكرتك ح تكون مدت الفيديو حوالي300,000,000 مليون ساعة ودي فترة زمنية كبيرة جداً.
والانسان عندو نوعين من الذاكرة، ذاكرة قصيرة المدى وذاكرة طويلة المدى وكل واحدة مختلفة تماماً عن التانية
• الذاكرة قصيرة المدي :
الذاكرة قصيرة المدى هي الذاكرة البتسمح بحفظ المعلومات الحديثة يعني فور تلقيها و تسمى أيضا الذاكرة الوقتية، ومن الشائع أن الذاكرة قصيرة المدى تحفظ من ٤ الي ٩ معلومة وقتياً، وفي حالة تم تكرار المعلومة اكثر من مرة تتحول المعلومة من الذاكرة قصيرة المدى الي الذاكرة طويلة المدى.
• الذاكرة طويلة المدي:
أما ذاكرة طويلة المدى هي البيتم حفظ المعلومات فيها لفترة اطول من الذاكرة قصيرة المدى و قابلة أنها تستقبل وتخزن معلومات اكتر من خلال تكرار المعلومات لفترات زمنية طويلة ومتباعدة، يعني مثلاً لو عندك قصيدة مكونة من ٢٦ بيت وانت شايف كلماتها صعبة وصعب انك تحفظها خلال اليوم ، ممكن تقوم تحفظها خلال اسبوع وبالتالي من خلال التكرار المستمر وفي فترات زمنية متباعدة (الاسبوع) حتتخزن في الذاكرة طويلة المدى.
• بعض النصائح للمحافظة علي ذاكرة سليمة وتقويتها
١- من اهم النصائح عشان تتمتع بذاكرة سليمة هي انك تشرب كمية مناسبة من المياه يومياً ويفضل أنك تشرب كميات كبيرة لسباب كتيرة منها أن نقص المياه في جسم الانسان بيسبب الجفاف و الصداع و الارهاق ودي كلها بتعوق عملية تخزين المعلومات و بتالي بياثر في عملية التعلم واهم سبب كمان هو ان المياه بتدخل في تكيون المخ بنسبة 73% يعني اي نقصان بياثر علي مخ.
٢- النوم و عدم السهر من افضل واحسن الطرق للمحافظة علي ذاكرة سليمة، حيث انو في اثناء النوم بيتخلص المخ من كل السموم وبيعيد حفظ كل المعلومات الاتحصل عليها خلال اليوم عشان كدا مهم جداً اننا ناخد قسط كافي من النوم.
٣- ممارسة الرياضة والنشاطات بيقلل من التوتر وبيساعد علي الهدوء وخصوصاً في وقت الامتحانات.
٤- توجد بعض الالعاب الممكن تساعدك أنك تحسن من ذاكرتك وتقضي وقت ممتع في نفس الوقت ومن اشهر الالعاب دي هي السودوكو والشطرنج، وفي مجموعة من تطبيقات تقوية الذاكرة للهواتف الذكية مفيدة ومسلية جدا، ومن اشهرها Lumosity و Peak
روابط التحميل:
تطبيق Peak
https://play.google.com/store/apps/details?id=com.brainbow.peak.app
تطبيق Lumosity
https://play.google.com/store/apps/details?id=com.lumoslabs.lumosity
• ملحوظة:
قد تحتاج لتطبيق vpn حتي تقدر تنزلهم من البلي استور
تعليقات
إرسال تعليق