ماهي افضل طريقة واكثرها امانا وفاعلية لتعلم البرمجة واحترافها بصورة ذاتية ج١؟
اول واهم حقيقة لازم تنتبه ليها في بداية مسيرتك في البرمجة وهي المسؤلة تخليك مبرمج ناجح او تخليك تكره البرمجة من اول شهر .. وهي :
((ماتتعلم اكتر من لغة برمجة ! ))
اصلا من الاساس مافروض تتعلم اكتر من لغة !
ولا ده معناو انك حتبقي محترف !!
بالعكس انت بتشتت نفسك بس !!!
البداية الصحيحة انك تبداء بلغة واحدة وتتعلم اساسياتها .. الخطوة التانية انك تبداء تطبق مشاريع عملية علي الحجات الاتعلمتها وتتعلم التقنيات المختلفة المستخدمة باللغة دي .. وكلما طبقت مشاريع اكتر كلما مهاراتك بتزيد اكتر وكده انت بتمشي في طريق الاحترافية.
وبعدها حتوصل لمرحلة تكون استوعبت اغلب المفاهيم بتاعت البرمجة .. وبعدها حتكتشف انو اغلب المفاهيم دي متكررة في اغلب لغات البرمجة .. وبالتالي حتلقي من السهولة جدا انك تنتقل من لغة برمجة للغة تانية (ده اذا فعلا احتجت)
التطبيق العملي والمشاريع اهم من كترة الشهادات !
حقائق المهمة عن التعليم الذاتي ... ماهي ؟
التعليم الذاتي عندو مجموعة من الميزات الجميلة والرائعة ومثال لكدة انو وقتك في يدك وبتقدر تدرس في الوقت البتكون فيو مرتاح وعندك الرغبة والمزاج للقراية .. بتقدر تدرس في اي مكان واي زمان .. وبتقدر ترجع لاي نقطة مافهمتها وفي اي وقت.
بالاضافة لانو التعلم الذاتي من افضل انواع التعلم .. لانو بيرسخ المعلومة بصورة اعمق بكتير جدا مقارنة بالطرق التعلم التقليدية .. والحاجة البتتعلمها براك مستحيل تنساها.
ولكن في حقيقة مهمة جدا لازم تنتبه ليها وانت مقبل علي الدراسة الذاتية وهي:
الصعوبة الشديدة في الالتزام والمواصلة !
لانو اغلب الناس بتبدا وبتكون متحمسة شديد بس بعد فترة ( اقل من شهر ) الحماس بيقل وبعدو الواحد بيمل وبيزهج وبكسر الحنك !
طيب الحل شنو ؟
الحل هو انك تعمل خطة دراسية وتقسم فيها المادة العاوز تقراها لمجموعة من المواضيع .. كل يوم يكون عندك عدد معين من المواضيع عشان تنجزها .. وتكون عارف انك حتخلص بعد كذا يوم
ماضروري تخت عدد كبير من المواضيع خلال اليوم الواحد .. كلما كان عدد المواضيع بسيط كلما اتشجعت وقدرت تنجز اكتر
خلي مساحة كافية في الخطة للاحداث الممكن تحصل خارج ارادتك .. الكهربا تقطع ، يجوكم ضيوف .. الخ
اخر حاجة خليك متسامح مع نفسك لو الخطة مامشت مية المية .. لانو غالبا المرات الاولي مابتظبط وبكون في فرق كببر بين التصور الاولي وبين الحاجة الفعلية الحصلت في النهاية.
اهم حاجة انك تحافظ علي حماسك وماتمل وماتحبط لانو دي مهارة بتجي مع مرور الوقت وكلما جربت اكتر كلما حتزيد مهاراتك وحتقدر تخت خطط دراسية محكمة ومظبوطة وممكن تكتشف اساليب واستراتجيات تانية فعالة اكتر
تعليقات
إرسال تعليق