ماهي افضل طريقة واكثرها امانا وفاعلية لتعلم البرمجة واحترافها بصورة ذاتية ج٣ ؟
ماهي المواصفات لاختيار كورسات مناسبة من اليوتيوب ؟
اليوتيوب بيحتوي عدد كبير جدا من الكورسات، وكلهم بيختلفو من حيث جودة المحتوي والشرح واحترافية الاستاذ و ..الخ، وفي كتير من الاحيان الواحد بيشعر بالتشتت في اختيار الكورس المناسب .. ويختار بصورة عشوائية واحتمال تظبط واحتمال ماتظبط.
في البوست ده حنتكلم عن المعايير المن خلالها تقدر تحدد انو الكورس مناسب ليك او لا
١ - يحبذ تختار كورس عدد الفيديوهات بتاعتو ماتكون كتيرة ومدة الفيديو ماتكون طويلة شديد ..
يعني ممكن عدد الفيديوهات يكون من ١٠ لغايت ٢٠ فيديو .. ومدة الفيديو الواحد حوالي ١٥ الي ٢٠ دقيقة بالكتير.
الكورس بالشكل ده بيعتبر قصير نسبيا .. والحاجة دي مهمة جدا خصوصا لما موضوع الكورس يكون جديد عليك لانو بيحفز الزول يبدا ويكمل ويكون مستوعب نسبة كبيرة جدا من المفاهيم الاساسية في المادة المختارة.
لقدام لما تستمر في الموضوع ممكن تدخل علي المواضيع المتقدمة ... وفي كتير من الاحيان مابتحتاج ليها اصلا !!
٢ - يفضل الكورسات البيكون الفيها مشاريع عملية حقيقية اثناء او بعد الانتهاء من الكورس
والاستراتيجية دي متبعة في افضل منصات التعليم الاونلاين العالمية مثال
edx .. coursera .. udacity .. futurelearn
وغيرهم.
٣ - و من الخيارات التانية الكويسة برضو هي الكورسات البتكون مضغوطة في شكل فيديو واحد طويل .. زي الفيديوهات بتاعت تعلم python في تلاته ساعات
الفيديوهات الزي دي بتحتوي علي اهم الاساسيات البحتاجها الزول في البداية بدون اسهاب في التفاصيل الغير مهمة للمبتدئ.
٤ - من النقاط المهمة شديد وفي كتير من الاحيان بتكون فايتة علي الناس وبتسبب ليهم مشاكل كتيرة وهي:
( ماتتعلم اكتر من حاجة مختلفة في نفس الوقت ! )
ممكن تحدد فترة مناسبة بين كل حاجة عاوز تتعلمها والتانية ..
مهم جدا انك تدي عقلك فترة راحة ونقاهة ..
التعليم الذاتي بيحتاج مجهود ذهني كبير ...
ولغايت هنا نكون وصلنا لنهاية اخر مواضيعنا .... في السلسلة دي حاولنا نشارك تجاربنا وخبراتنا معاكم .. ونتمني انو الناس تكون فعلا استفادت
بنشجع كل واحد انو يبداء ويطبق ويجرب .. والواحد بيتعلم من تجاربو .. وممكن تتوصلو لنتاج تكون افضل واعمق من الوصلنا ليها
ولو في اي واحد عندو خبرة عاوز يشاركها ممكن يكتبها في التعليقات حتي الناس كلها تستفيد
تعليقات
إرسال تعليق