كيف اطور لغتي الانجليزية ج٣

في المنشور ده حنشوف تلاته من الممارسات المهمة

 والمفيدة البتساعدنا في تحسين وتطوير لغتنا الانجليزية، وفي نهاية المقال حنشارك معاكم بعض من اشهر نوادي المخاطبة العامة في الخرطوم. 

١- الاستماع في الموصلات

 الوقت البنقضيهو في الموصلات مابسيط ولو قعدت تحسب في الاسبوع انت بتقضي كم ساعة في الموصلات حتندهش بالتاكيد، لانو اغلب الناس بتقضي اسبوعيا حوالي (١٠ - ٢٠) ساعة في الموصلات وده رقم كبير جدا وغالبا بيضيع ساي بدون نستفيد منو اي حاجة

 

بننصح انو الواحد ينزل بعض من المواد الاتكلمنا عنها في البوست الفات في التلفون (بحيث ماتحتاج تفتح الانترنت) ويكون عندك سماعة صوتها كويس، وبالتالي حتقدر تستفيد وتستمتع بالوقت البتقضيهو في الموصلات

٢- الجدول الشهري 

ممكن تعمل جدول شهري من خلالو تتعلم وتتعرف علي مجالات تانية، بحيث انو في كل شهر تستمع وتقرا عن مجال مختلف (تقرا عن التعليم، الصحة، الاقتصاد، الرياضة، الفنون، الجغرافيا، ...الخ) والحاجة دي حسب مستواك في اللغة، 

التكنيك ده حيزيد من ذخيرتك اللغوية بصورة كبيرة وحتكون قادر تتواصل في شتي المجالات والمواقف. 

٣- نوادي المخاطبة (English Clubs) 

تعتبر نوادي المخاطبة مفيدة جدا ومن المهم انو كل واحد عاوز يتحسن في الانجليزي انو ينضم ويواظب علي الاقل في نادي مخاطبة واحد، واهم فائدتين من نوادي المخاطبة هي:

أ- بتساعد في المواظبة والانتظام في ممارسة اللغة، وبالتالي بتحسن من مستواك

ب- بتمدك بالتشجيع المعنوي اللازم، وده لانها بتوفر ليك مجموعة من الناس بتتشارك معاهم نفس الاهتمام والشغف، وبتلقي ناس بتقدر تستفيد منهم ويساعدوك اكتر

• بعض من اشهر نوادي المخاطبة العامة :

١- نادي المخاطبة التابع لل British Council (مجاني) 

الموقع : الخرطوم

المواعيد: كل يوم خميس (٦م - ٧م) 

٢ - نادي المخاطبة من كلية كمبوني (مجاني) 

الموقع: كمبوني شارع الستين

المواعيد: الاحد والتلات والخميس (٣م - ٥م)

٣- نادي المخاطبة من Learning Pleasure 

الموقع: الخرطوم شارع اوماك

المواعيد: مختلفة ويتم تحديدها كل اسبوع في صفحة المركز علي الفيسبوك 

٤- مركز ستانفورد للغات (مجاني) 

الموقع: السوق العربي شارع عبدالمنعم، عمارة البحر الأحمر الطابق الثالث، 

المواعيد : ايام الاثنين والاربعاء 

لو بتعرفو نوادي مخاطبة تانية كويسة ممكن تشاركونا بيها في التعليقات حتي كلنا نستفيج ونتشارك المعلومة